2022年9月28日
撰文: 徐蓉蓉
唱作歌手何展睿Steve於生日當天舉行小型音樂會，原來為答謝粉絲支持而特意舉行：「應承咗粉絲好耐要舉行mini live，所以就唸到係自己生日呢個重要日子唱歌去報答佢哋，仲比佢哋事前點唱，亦叫粉絲唔好送禮物比我，將心意捐去動物團體幫下毛孩」。Steve表示為準備音樂會都花盡心思：「因為今次音樂會想比聽眾一種舒服、文青感覺，所以自己都親自佈置，苦練結他自彈自唱，希望大家都會睇到我另一面！」
完成演出後立即慶祝生日，Steve指休息就是最好的禮物：「完咗會同太太媽咪去酒店Staycation，休息放鬆對我嚟講已經係最好既禮物。至於今年生日願望都想自己既音樂可以更多人認識同支持、音樂學校發展越嚟越好，屋企人上下都要身體健康！」
至於講到近期發生「人生小低潮」，Steve表示只能當作上天給自己的挑戰：「記得上個月有一個星期內接二連三發生唔好既事：太太捐血暈倒、狗狗突然嘔血入院，我就將心聲創作一首新歌《經得起挫折》，當係自勵自勉啦！」
講番近期發生的開心事，早前Steve為慶祝結婚四周年，花盡心思氹太太開心：「因為太太真係幫我好多，我要比驚喜佢氹佢開心：事前秘密錄片自彈自唱、秘密買禮物、秘密book酒店Staycation、仲要秘密訂蛋糕送上房，真係使盡渾身解數，最後佢都應該幾開心！」
最後，Steve表示閉關半年後，準備起動新的音樂計劃：「其實閉關半年，默默努力，大部分時間用嚟做音樂，已經完成幾首新歌明年準備發表，年底繼績唱片錄音工作，希望明年可以成功出新專輯。而歌迷期待已久既《愛情六重奏下集》終於要面世，非常興奮同非常期待！」
